Anyoika bo cut Nuisisianakini Ebaibuli?

KOSIOM adiopapula naiyemuto. Kosesen etelebision araibo kopup eredio. Ejaas iyemuto luipu noi luikamunitos amengeranut, ejie, ka apeleinikin aiyar itunga! Ido komoom ber ijo nuikamunitos atiokisio kon. Aticepak adeka araibo atwanare naka iminat kon nges kinakinit ijo aipup apipil noi. Aticepak ipupi ijo kwape Yob etunganan loajokuna, loabala ebe “etei akaiticanio.”—Yob 10:15.

Kingitakin:

• Eraasi Kereka nu nualosikinit Edeke kanuka ka itunga kere?
• Aibo apedori eong adumakin aingarakinio kanu atitingikin atiokisio ka?
• Ejai kereka adiomuno ebe ipedori oni adumun ainapakin kotoma akwap?

Einakinit Ebaibuli abongonokineta nuecaete nejaas aingiseta nu

ISISIANAKINI EBAIBULI EBE EBEIT EDEKE AYAUN AIJULANAKINETA NU TOMA AKWAP.

“Emwatari akiyo kere kakonyenekec, mam bobo ejaun atwanare, karaida akuudian, karaida aimony, karaida ariebo.”—Apukokinio 21:4

“Kosodi ewalas asomar kwape amiam.”—Isaia 35:6

“Kosodete akonye nuka imudukiok akwenyun.”—Isaia 35:5

“Itua kere luejaas atesin . . . elomunete.”—Yokana 5:28, 29

“Loiboenenei kanen mam ebala ebe, ‘Adek eo.’” —Isaia 33:24

“Idiliunete akima kakwap.”—Isabulin 72:16

KIMEDAU KOTOMA AKIRO NUISISIANAKINI EBAIBULI

Siri kisunyak aigir nuitodiaritai kwape nuemamei abeit. Isumunit Edeke ayangaun iboro lu, ido itetemit Ebaibuli epone loebeitor ngesi aswam nu.

Konye isisianakini Ebaibuli nuedeparitos ngun. Ijaikinit ijo elacet loka adumunia aijar naejaasi kede alosikinet karaida kwapekwana. Komoom ber ijo nuikamunitos aiyalongong ka atiokisio kon. Aticepak imoriaritos kes akiro nuka isirigin, atiokisio nukokale, angaleu, araibo atwanare naka iminat kon. Epedori Ebaibuli angarakin ijo atitingikin atiokisio kon, ido epedori aisinapikin ijo koipone loabongonokin aingiseta kwape kanu:

• Kanukinyo iticanitor oni?
• Epone ani ipedoria oni atitingikin atiokisio nuka aijar?
• Epone ani ipedoria oni adukun aijar nakokale naelakara?
• Anyoika nuetakanikinete oni neitwakia?
• Ipedori kereka oni aanyun luminan wok luatwakata bobo?
• Epone ani ipedoria oni amunokin ebe ebuni Edeke aitololikin aisumuneta ke nukoingaren?

Abeit ebe isiom ijo eitabo lo, itodunit cut ebe ikoto ijo ajenun nuisisianakini Ebaibuli. Ebuni eitabo lo aingarakin ijo. Koany ebe, ejaatatar kede atutubeta ka aingiseta kwap naka apapula. Itunga luipu elelakinitos aisisia Ebaibuli kede Ajenak luka Yawe kitosomaete aingiseta ka abongonokineta. Imuno ebe ibuni ijo da aswam ngun. Aso kisirereng ijo Edeke kotoma aisisia kon nuisianakini cut Ebaibuli!

KOJENU EBAIBULI KON

ITABON ka ibaluan 66 kesi iswamautos Ebaibuli. Etiakatiakatai kesi kwape isulai ka ikokoron tetere epatana aisiom. Neitodunitere aiwadikaeta nuka Ebaibuli kotoma oitabo kalo, enaba losodit loetupakin ekiror loka eitabo erai esula, ido loetupakini erai ekokoro. Kwape aanyunet, aijuluraet naka “2 Timoteo 3:16” akepolou ebe ebalua lokiareit nejai Timoteo, esula 3, ikokoron 16.

Kipatanikini do ijo anaikin aisiom Ebaibuli katipet arai iwanyanari ijo aiwadikaeta nu ijuluraitai koitabo kalo. Aso, kanukinyo mam igeuna ainapetait naka asiomenen Ebaibuli kanginipaaran? Arai isiomenenei ijo isulai iuni kiton ikany kanginipaaran, ipedori ijo adaun aisiom Ebaibuli kere kokaru ediopet.