 |
Beliefs | Future | Medical | Topics | Contact Us | Publications | Languages |
ONAN na katinuodan? Mahitungod sang importantihay na mga pangutana ng mga otaw. Seguro, yakapangutana da kaw ng ama sin-i:
Hain kaw manghanap ng tubag sin-i na mga pangutana? Kon mokadto kaw sang mga librarya o kaha sang mga tindahan ng mga libro, seguro kit-on mo yang libo-libo ka mga libro na yagpasalig na awon mga tubag. Pero kasagaran si-an na mga libro, wâ managkauyonay. Yang iban na libro kaposlan pa doon pero kisom dì da magamit kay karaan da, agaw sa utrohon da isab nilan pagsuwat o kaha pulihan.
Aber pa si-an, awon isa ka libro na kyasodlan ng kasaligan na mga tubag. Amo ngini yang libro ng katinuodan. Si Jesus yagala-ong sang kanaan pag-ampo sang Diyos: “Katinuodan yang kanmo tiyab.” (Juan 17:17) Doon kita yasayod na ngiyan na Tiyab, amo yang Balaan na Bibliya. Sang sunod na mga pahina, kit-on mo yang hayopo pero klaro, tinuod na mga tubag ng Bibliya sang mga pangutana na iyan sang taas.
NANGÂSA KYAPANGUTANA NGINI: Yagahuya kita sin-i na kalibotan na puno ng kasamok hasta inhustisya. Madaig na mga relihiyon yagatudlo na yang pag-antos na kanato i-atubang doon, pagbuot ng Diyos.
ONAN YANG ITUDLO NG BIBLIYA: Yang Diyos dì gayod amo yang hinungdan ng karaatan. “Halayo-ay sang tinuod na Diyos na mohinang ng karaatan, hasta yang Pinakagamhanan na mohinang ng dì makataronganon!” la-ong ng Job 34:10. Awon mahigugmaon na tuyo yang Diyos sang mga otaw. Amo yang hinungdan na si Jesus yagatudlo kanato na mag-ampo: “Amâ nami na iyan sang mga langit, pakani-a … yang kanmo gingharian. Matuman gawo yang kanmo kagustohan, sang langit, amo isab sang lupa.” (Mateo 6:9, 10) Grabe gayod yang pag-atiman ng Diyos kanato kay yagasakripisyo yaan para segurado na matuman yang kanaan tuyo.—Juan 3:16.
Tanawa isab yang Genesis 1:26-28; Santiago 1:13; hasta 1 Pedro 5:6, 7.
NANGÂSA KYAPANGUTANA NGINI: Yang giyera permi makapatay ng madaigay na kinabuhi ng otaw. Hurot kita yatangkog tungod ng pag-antos.
ONAN YANG ITUDLO NG BIBLIYA: Yagatagna yang Diyos ng isa ka panahon na plastaron naan yang kalinaw sang entiro kalibotan. Sang kanaan Gingharian na itawag na langitnon na gobiyerno, yang mga otaw dì da “matigam ng giyera aber kin-o.” Hinuon, kanilan “pugpugon yang kanilan mga espada para hinangon na mga punta ng daro.” (Isaias 2:4) Taposon ng Diyos hurot yang inhustisya hasta pag-antos. Yang Bibliya yagsaad: “Trapohan [ng Diyos] yang mga luha sang kanilan mga mata, hasta yang kamatayon ma-wâ da, nihay pagbangotan ni pagtiyaho ni awon pay kasakit. Yang una na mga butang [apil yang mga inhustisya hasta pag-antos doon] yangagi da.”—Pinadayag 21:3, 4.
Tanawa isab yang Salmo 37:10, 11; 46:9; hasta Miqueas 4:1-4.
NANGÂSA KYAPANGUTANA NGINI: Halos hurot mga relihiyon sang kalibotan yagatudlo na pagkamatay ng otaw awon pay espiritu na yagpabilin na buhi. Yang iban yagatuo na yang mga patay makadaot sang mga buhi o kaha sakiton ng Diyos hangtod-sa-hangtod yang mga daotan ngadto sang yagalaga na impiyerno.
ONAN YANG ITUDLO NG BIBLIYA: Kon yang otaw patay da, wâ da gayod yaan. “Yang mga patay ... wâ day kyasayodan na aber onan,” la-ong ng Ecclesiastes 9:5. Kay yang mga patay dì da man masayod, mobati, o wâ da may mahimo aber onan, amo yaan na dì da silan makadaot—o makatabang—sang mga buhi.—Salmo 146:3, 4.
Tanawa isab yang Genesis 3:19 hasta Ecclesiastes 9:6, 10.
NANGÂSA KYAPANGUTANA NGINI: Gusto nato mabuhi, gusto isab nato makapahimos ng kinabuhi na malipayon kaiban yang kanato ihigugma. Normal lamang kanato na mangandoy na kit-on utro yang kanato yamatay da na mga hinigugma.
ONAN YANG ITUDLO NG BIBLIYA: Halos hurot sidtong patay da, buhi-on. Yagasaad si Jesus na “ngidtong iyan sang lubong na timan-anan … manlugwa.” (Juan 5:28, 29) Uyon sang orihinal na tuyo ng Diyos, ngidtong ibuhi na mga otaw awon purohan na makahuya sang paraiso na lupa. (Lucas 23:43) Ngini na kaugmaon, apil yang perpekto na panlawas hasta kinabuhi na way pagkatapos isaad para sang masinundanon na mga otaw. La-ong ng Bibliya: “Yang mga matarong mismo amo yang makatag-iya sang lupa, silan amo yang maghuya sang babaw sin-i hangtod-sa-hangtod.”—Salmo 37:29.
Tanawa isab yang Job 14:14, 15; Lucas 7:11-17; hasta Buhat 24:15.
NANGÂSA KYAPANGUTANA NGINI: Yang mga otaw sang hurot relihiyon yagaampo. Pero, ibati ng iban na yang kanilan mga pag-ampo wâ tubaga.
ONAN YANG ITUDLO NG BIBLIYA: Yagatudlo si Jesus na likayan yang pag-ampo na uli-uli-on pagtiyab. “Kon mag-ampo,” la-ong naan, “ayaw da uli-uli-a pagtiyab yang amo da gihapon na mga butang.” (Mateo 6:7) Kon gusto nato na panalingahan yang kanato mga pag-ampo, mag-ampo kita sang paagi na iuyonan naan. Para mahimo yaan, kinahanglan na kita masayod kon onan yang kagustohan ng Diyos dayon mag-ampo uyon saan. Yang 1 Juan 5:14 yagpasabot na: ‘Aber onan yang kanato pangayoon basta uyon sang kagustohan [ng Diyos], manalinga yaan kanato.’
Tanawa isab yang Salmo 65:2; Juan 14:6, 14; hasta 1 Juan 3:22.
NANGÂSA KYAPANGUTANA NGINI: Madaig na otaw yagtuo na kon silan sapi-an, sikat, guwapo o kaha guwapa amo yang makapalipay kanilan. Agaw sa, ikab-ot nilan yaan na mga butang pero wâ sa gihapon silan kalipay.
ONAN YANG ITUDLO NG BIBLIYA: Ihisgotan ni Jesus yang yabi ng kalipay sang-awong yaan yagala-ong: “Malipayon ngidtong mahunahunaon sang kanilan espirituwal na kinahanglanon.” (Mateo 5:3) Yang tinuod na kalipay maangkon lamang kon hinangon nato yang mga butang na uyon sang kanato bagas na kinahanglanon—yang kanato pagsusi ng katinuodan bahin sang Diyos hasta sang kanaan tuyo para kanato. Kit-on nato yaan na katinuodan sang Bibliya. Matabangan kita na masabtan kon onan gayod yang importante hasta dì, kon kasayodan da nato yang katinuodan. Kon yang katinuodan ng Bibliya tugotan nato na mogiya sang mga desisyon hasta mga lihok, ngini mohatod kanato sang mas awon kaposlanan na kinabuhi.—Lucas 11:28.
Tanawa isab yang Proverbio 3:5, 6, 13-18 hasta 1 Timoteo 6:9, 10.
Diyotay lamang ngini na pagsusi sang mga tubag ng Bibliya sang sais ka mga pangutana. Gusto kaw ba na masayod ng dugang pa sin-i? Kon ikaw apil sidtong “mahunahunaon sang kanilan espirituwal na kinahanglanon,” way duda, gusto kaw. Yagahunahuna kaw seguro ng iban pa na pangutana na ama sin-i: ‘Kon yang Diyos yagaatiman kanato, nangâsa itugotan naan yang sobra ka daotan hasta pag-antos sang entiro kaagi ng otaw? Onan hinangon ko para mo-arang-arang yang panghuya ng kanak pamilya?’ Yagahatag yang Bibliya ng segurado na makatagbaw na mga tubag si-an, hasta sang madaigay pa na mga pangutana.
Pero, madaig doon kapoyan mobasa ng Bibliya kay makalaay kono ngini basahon tapos usahay malisod pa gayod sabton. Gusto kaw ba na matabangan para kasayodan mo yang mga tubag na iyan sang Bibliya? Yang mga Saksi ni Jehova motanyag kanmo ng duha ka mga hiraminta na makatabang kanmo.
Una, yang libro na Unsay Tinuod nga Gitudlo sa Bibliya? ituyo ngini paghinang para tabangan yang mga otaw na madaig yang trabaho na masusi yang klaro na mga tubag ng Bibliya sang importante na mga pangutana. Yang ikaduha na hiraminta amo yang libre na pagtuon ng Bibliya sang bay. Mokawon sang kanmo bay yang isa sang mga Saksi ni Jehova na sayod sang Bibliya o kaha sang iban na lugar na pwede kaw ma-estorya. Pero diyotay lamang na panahon kada semana para mahisgotan mayo yang Bibliya na way bayad. Milyon-milyon na mga otaw sang entiro kalibotan yakapahimos sin-i na programa. Madaig kanilan himayaay na yakala-ong sin-i: “Ikita da ko gayod yang katinuodan!”
Wâ day mas molabaw pa sin-i na kabtangan na pwede kit-on. Yang katinuodan ng Bibliya yagapalugwa kanato gikan sang patuotuo, kalibog, hasta sobra na kahadlok. Yagahatag ngini kanato ng paglaom, katuyoan, hasta kalipay. Si Jesus yagala-ong: “Masayod kamo ng katinuodan, kay yang katinuodan mopagawas kamayo.”—Juan 8:32.
Gipatik sang 2009 |
 |